حاسس انك مخنوق !!

حاسس انك مخنوق قوى...حاسس انك مبقتش سعيد ويمكن كمان استحالة تعرف السعادة

كتير انا كمان جالى الاحساس دة....كتير حسيت اد اية الحياة وحشة وصعبة ويااااة على كم المرات اللى اتمنيت فيها اموت عشان اخلص بقى...اخلص مش عشان اعيش فى السما بس اخلص عشان
انا مبقتش قادر اعيش فى الارض

قولى اية اللى تعبك؟؟

قبل متتكلم عاوز اقولك على معلومات مهمة وانتا بتقرا النوت دى
تخيل انك لو عندك هدوم فى بيتك واكلك فى تلاجتك فانتا اغنى من 75 % من سكان العالم
اذا كنت قادر دلوقتى تضغط بزرار الماوس وانتا قاعد على الكمبيوتر فانتا افضل من 500 مليون واحد معاق فى العالم
ولو ليك بيت ودلوقتى انتا فى امان تحت سقف بيتك فانتا حالك افضل من 300 مليون شخص فى العالم ملهمش مكان امن يسكنوا فيه يأما بسبب الحرب او بسبب الفقر

انا مقدر جدا اللى بتمر بيه وبحترم احساسك ومشاعرك وبحترم تذمرك بس تعالى نتكلم سوا فى سبب خنقتك لو هى اخطر من الموت والتهديد والتشرد والمجاعة والحرب

عندك مشاكل فى شغلك...اشكر ربنا على ان عندك شغل واتبسط جدا حتى لو مرتبك قليل كتير غيرك مش لاقيين الفرصة دى واستغلها وحتى لو واجهت مشاكل افتكر دايما ان نفس الاله اللى اداك الفرصة دى هو نفسه نفسه لسه موجود قدامك تطلب مساعدته وهو هيقدرك تتجاوز المشاكل دى بس متنساش تشكره قبل متعاتبه على المشاكل لانك افضل من ناس كتير... البطالة وصلت لاكتر من سبعة مليون عاطل فى بلدك

عندك مشاكل فى بيتك...من اصعب المشاكل اللى ممكن الواحد يواجهها فى حياته بس عاوز اقولك ان ربنا قال من يجمعه الله لا يفرقه انسان خلى عندك ثقة فى الله وفى وعوده ان الله يجمع لا يفرق ولو عندك الايمان الكافى بدة المشكلة بتاعتك هتلاقى ليها بدل المخرج الف بس يكون عندك ثقة وكمان لو من جواك انتا المحبة الحقيقة هتنعكس على اى فرد فى البيت وهتلاقى السلام دة موجود فى بيتك بعمل وايد ربنا وبمساعدتك

عندك مشاكل مع صحابك...يااااة انتا عندك اصحاب اصلا؟؟..صدقنى فى ناس كتير مش لاقيين حد يصاحبوه ولا حتى يخرجوا معاه وحاسين دايما بالوحدة اشكر ربنا انك عندك اصحاب وانا عارف ان جرح الناس القريبة منك بيبقى اصعب بس انتا ياما جرحت ربنا حاول تبدأ تتعلم ازاى تسامح وازاى تغفر وازاى تقدر تتجاوز عن اى اخطاء وبدون كلمات زى الكرامة والفاظ كتير اخترعناها بس عشان نفسد علاقتنا مع بعض مع ان المسيح نفسه رضى بانه يتهان ويتصلب ويموت عشانا

مريت بتجربة عاطفية صعبة...اين كان اللى جرالك مش هيبقى اصعب من ناس دلوقتى بيتهم متقسم بسبب الطلاق واطفال بتعانى من خناقات كتير بين الاهل فيمكن ربنا نجاك من حاجة انتا متعرفهاش..والحاجة الاهم انتا مش الحكاية كلها انك عاوز حبيب...طب مش ربنا حبيبك ولا مش حبيبك؟؟..انتا بجد حاسس بالحب دة؟؟راجع نفسك هتلاقى ان الحبيب الوحيد اللى مش هيزعلك ولا هيخونك هو ربنا وانتا نسيت دة افتكر دة وحس بدة وتعايش مع الحب الالهى وساعتها اوعدك ان ربنا هيبعتلك اجمل قصة حب فى الدنيا بس حب ربنا الاول

حاسس انك وحيد...اولا انتا مش وحيد لانك موضع اهتمام خاص من ربنا اذا كان ربنا بيهتم بالعصافير مش هيهتم بيك انتا؟؟...ومتقولش ان ربنا ناسيك متنساش انه الاله القوى والقادر على كل شئ واكيد المتذكر لكل شئ يعنى هو عمره ما هيكون ناسيك...وانتا محتاج ناس بعد ربنا؟؟..لو شبعت منه مش هتفكر فى ناس اصلا بس عاوز اطمنك ربنا بس عاوز يقولك انك مش لوحدك لانى انا معاك حس بدة وانا هديك كل الاصحاب اللى نفسك فيهم..بس صدقنى لو وصلت لمرحلة انك عاوز تشبع من ربنا هتنسى الناس اصلا

حاسس ان الناس بتكرهك...اسف جدا انتا اجمل المخلوقات اللى فى الدنيا ودى حاجة حقيقة انتى ناسيها انك صورة الله ومثاله..عارف يعنى اية صورة الله؟؟!!..عملت حاجة كتير غلط فى حياتك؟؟؟...طبعا عارف داود النبى دة وقع فى خطية الزنا...وشمشون زيه...وايليا النبى العظيم هرب من امام الله وخاف فى لحظة...ويونان هرب وتكبر واتغر...وكل دول انبياء وملوك وقضاة كلنا بنفخر بيهم..متركزش على خطيتك وركز على خلاصك والاهم دة انتا لازم تفهم كويس انك محبوب من اهم واحد فى الكون كله وهو ربنا

انا عاوزك فى الاخر تبقى فاهم كويس جدا انك كائن مهم جدا عنده اله قوى وبيحبه جدا وانك موضع اهتمام اعظم ما فى العالم وهو ربنا وفكر فى كلامى دة اول متحس انك كئيب او زعلان...ربنا يفرح قلبك :)

بتمني ان ربنا يسعدني ويسعد كل انسان في ضيقة وموجوع وعنده هموم
شكرا ليكي يا كوكي
كل سنة وانتي طيبة

امين استاذ ديفيد
وكل سنة وحضرتك طيب

كلام جميل ورائع يلمس القلب الموجوع ويمنحه راحه وسلام واطمئنان انه مش لوحده في العالم ولكن معه رب المجد وهو سنده الوحيد
شكرا ليكي يا كوكي وربنا يفرح قلبك يا ديفيد وقلب كل حزين ببركه الصوم والايام المقدسه

بصراحة جات فى وقتها الرسالة دى
فشكراً لك وكلمات التعزية فى الوقت الراهن هى اهم الكلمات حتى ولو بسيطة بس تكون معبرة

» دعاء مواطن مخنوق من نفسه ومطحون من الدنيا
» يسوع حاسس بيك
» حاسس انى مزعلك
» حاسس بغربة
» لو حاسس باى ظلم اطلب شفاعة هذا القديس العظيم و مش هتندم